top of page
搜尋

[加拿大稅務] Health Spending Account (HSA)

  • Jet So
  • 2024年10月29日
  • 讀畢需時 3 分鐘

已更新：1月7日




喺我適應加拿大嘅過程中，發現唔少公司提供嘅福利計劃入面有「醫療開支賬戶 (Health Spending Account/ Healthcare Spending Account (HSA/ HCSA)」。但令人意外嘅係，好多人對呢個選項了解唔多，甚至未必知道佢有幾大幫助。今次就深入講下 HSA 呢個「被忽略嘅賬戶」，睇吓佢點樣幫你理財同慳稅。


HSA同TFSA／RRSP／FHSA不一樣，唔係一個比你儲錢／投資嘅戶口，而係比你用作抵銷醫療相關支出嘅開支戶口。



HSA 有咩好處？

  • 免稅支付醫療費用

    • 喺 HSA 賬戶入面嘅資金，用嚟支付合資格嘅醫療費用係完全免稅嘅。


    • 例如我之前去按摩，收費CAD135，連稅CAD17.55(13%)，合共要支付CAD152.55。

      如果我只係claim公司保險，就只會包CAD107.1，剩低嘅CAD45.45要自己拎錢出黎。但係，用埋HSA的話，就可以用HSA去支付果CAD45.45，即係自己一蚊都唔使俾！


  • 靈活應對醫療需要

    • 你可以將 HSA 資金用喺唔同類型嘅醫療服務上，只要符合加拿大稅局 (CRA) 嘅合資格範圍，幾乎冇乜限制。例如，OHIP唔包嘅治療（例如按摩、眼鏡(prescribed)、牙科）、你公司保險包但唔夠cover全額嘅項目 - 基本上，你都可以用 HSA 支付。


    • 如果你對自己嘅HSA咩項目包／唔包有任何疑問，我會建議你直接問清楚保險公司。見過reddit有人討論，話自己可以用HSA去抵銷從人工中扣除嘅Health & Dental Premiums，但亦都有人話自己嘅保險公司唔容許呢個做法。


  • 餘額滾存機制

    • HSA 通常會有一定嘅滾存機制：即係今年用唔晒嘅HSA金額，有啲計劃會容許你將佢留到下一年繼續使用，避免浪費。

    • Carryover通常都係一個Policy year，即係你於2024年未用完嘅HSA額度，可以於2025年用埋佢；但帶唔到落2026年。


      - 用圖可能會易少少睇：假設你每Policy year HSA嘅新額度為CAD1,000

      - 如果你係2024年用咗CAD500，咁用唔曬嘅CAD500就可以帶落2025年。

      - 係2025年，你entitle嘅HSA額度就係CAD1,500。

      - 假設你係2025年唔記得咗用HSA，咁2026年你entitle嘅額度就係CAD2,000 (1000+1000)。未用嘅2024年CAD500額度，就會無咗。

    • 如果你唔清楚公司plan比唔比carryover，就要自己睇翻你份公司保險相關條款；或者搵翻個plan number出黎，打上CS問。


  • 減少個人/ Dependents醫療負擔

    • 如果你/ 你嘅Dependents（要符合Income Tax Act of Canada嘅定義）有大額嘅醫療開支（例如牙醫手術或眼科手術），HSA 可以大大減輕你嘅財務負擔。特別對有dependent需要持續醫療服務嘅人嚟講，非常有用。



HSA 有咩限制？

  • 公司有提供先可以享用

    • HSA 唔係所有人都可以用，只有公司有提供呢個福利嘅員工先可以參與。對於自僱人士或者冇呢類公司福利嘅人嚟講，呢個選項就無法使用。


  • 有使用期限

    • 有啲 HSA 計劃規定，你必須喺一定期限內使用完HSA嘅額度，否則會作廢。如果你無計劃好醫療開支，可能會浪費呢啲額度。


  • 僅限於合資格醫療開支

    • 雖然 HSA 可用於多種醫療用途，但唔係所有健康開支都合資格。例如，非處方藥物、健身房會員費或者美容療程就唔會被涵蓋。


  • 資金上限有限

    • 公司提供嘅HSA額度通常都有上限，所以如果你有非常大額嘅醫療開支，HSA 未必可以完全覆蓋，可能需要額外自費; 但多少可以補幫一下嘅。



點樣合理地分配Flex Credit？

如果你嘅公司提供Flex Credit，以下係一個建議分配策略：

  1. HSA

    • 如果你預計有醫療開支，唔一定係大病痛，可以係RMT按摩、物理治療、配prescribed眼鏡之類 - 優先將credit分配到 HSA，可以免稅支付呢啲費用。呢個選項特別適合有家庭或者健康需求多、但保險唔夠全額cover嘅人。


    • 另外，如果你追求Tax efficiency，同TFSA／RRSP相比，分配去HSA會係最好嘅方法。因為分配去HSA嘅錢，係唔會增加你嘅taxable income，亦都唔需要係使用時被額外徵稅。


  2. RRSP

    • 如果你嘅收入較高，但又未供爆RRSP，可以將部分credit分配到 RRSP 減低當年嘅應稅收入，同時為未來退休做準備。但係要留意，他日提款時你係要交稅的。


  3. TFSA

    • 如果你想隨時提取資金，而又唔想俾利得稅，呢個就係好選擇。但係要留意，佢會推高你該年收入，有機會令你於該年要交多咗稅。



如果你對自己嘅plan有任何疑問，記住要問清楚自己公司／保險公司啦。




bottom of page